Çima Barzanî???

heger kurdan dîroka bizanîbana û nasîbana îro wê hemî kurdan xwe li dor Barzaniyan bikirana yek da ku bi rêvebirina wan em kurd jî bibana xwedî dewlet û li axa xwe bi azadî bijiyan. Helbet wê ev ê bibe. LÊ….

02.07.2020, Per - 12:09

Çima Barzanî???
Nuçe Belav bike

Min gelek caran gotiye, ez tim bêjim, ji ber vê dixwazim dîsa bêjim û gotina dawî di pêşî de vebêjim, da ku hin kes xwe newestînin û heta talî vê nivîsê nexwînin…

Min tim gotiye û dîsa vê tînim zimên ku di roja îro de yên ji bona me kurdan dikarin an bikaribin kurdistaneke azad û serbixwe ragihînin, tenha Barzanî ne.

Çima?

Divê em carekê, bê layan, bê alî, bê teref li rewşa kurdistanê ji roja hatiye perçekirin û heta niha binêrin, binêrin û hûnê bibînin ku şopa nigên Barzaniyan li ser erda her çar perçê kurdistanê heye û bi rehetî tê dîtin.

Em dizanin û dixwînin ku roja Barzaniyan dest bi tekoşîna azadiya kurdistanê kirine, ji bona xwe, ji bona miletê xwe destûr û bernameyek, rê û rêbazek nivîsîn û ew parastin ku tekoşîna azadî û serxwebûna Kurdistanê li gor wê bê dayîn.

Çi bû ew?

Ew destûr û bernameya neteweyî li ser asasê berjewendiya gelê kurd bû. Loma bi rêzên zêrîn li ser kaxiza sipî nekişandin ku divê kurd li gor wê tevbigerin da ku bikaribin bighêjîn mafê xwe ê rewa.

Ew destûr, bername û rêbaza Barzaniyan nivîsîbûn û pêşkêşî gelê xwe kiribûn, bi xweşe dagirkerên me ne çû bû. Lewra ji bona têkbirina wê tim her çar dagirkerên me, ji bona tunekirina wê rêbaza ku tê de Kurdistaneke serbixwe xuya dikir, ji holê rakin, kar û xebat bi hevre dikirin û hê jî dikin.

Dagirker ne bes bûn, wan hin xwefiroş û berjewendîperestên kurd jî kirîn û ew jî berra pêxîla Barzaniyan dan, ew bi kar anîn û tînin.

Em hemî baş dizanin û bi wê yekê bawerin ku dagirkerên me di wê xewnê de bûn û dene ku çi dema Barzanî nemînên dê doza gelê kurd û kurdistanê jî nemîne. Ew ango dagirkerên me, di vê dîtin û helwesta xwe de rast in û rast bûn.

Heger em li dîrokê binêrin em ê bibînin ku ji bona tunekirina Barzaniyan tim jî plan û projeyên dagirkerên me yên hevbeş hebûn û hene.

Lê derdê giran, birîna bê derman ew e ku Kurd ne dîroka xwe dizanin û ne xwe fêr dikin, ne jî dixwazin fêr bibin.

Ji ber vê dibêjim; heger kurdan dîroka bizanîbana û nasîbana îro wê hemî kurdan xwe li dor Barzaniyan bikirana yek da ku bi rêvebirina wan em kurd jî bibana xwedî dewlet û li axa xwe bi azadî bijiyan. Helbet wê ev ê bibe. LÊ….

Hezar mixabin kurd di vî warî de fêmkor in. Kerr û lal in. Piraniya Kurdan jî bi çand, fikir û ramanên dijminên dixwazin kurdan ji holê rake, mezin bûne an perwerdeya xwe ya ewil ji wir girtine.

Bi sedan sal in ku Kurd derdê bê deweletbûnê dikşînin. Lê dîsa li xwe hay nabin. Miletê dîroka xwe fêr nebin û nizanibin, dê tu caran nikaribin xwe bi rehetî azad bike.

Îro şansa kurdan ji her demê zêdetir heye ku li başûrê kurdistanê bibe dewlet. Li wir hema bêjin êdî serê dewleta kurdî xuya dibe.

Loma dagirkerên me har bûne, her yek ji alîkî de êrîşên xwe yên bê wate dibin ser wê hebûna ku wê kurdan bike xwedî dewlet.

Ev ne bes e, dagirkerên me sedema êrîşên xwe, hin partiyan dikin sedem da ku di qada navneteweyî de xwe bi heq derxin. Lê dîsa jî wan kurdên di xizmeta dagirkeran de ne, bi xebat û çalakiyên xwe, dagirkeran dikşînin nava axa azad.

Çareserî???

Tenha çareserî li gor min rabûna gelê kurd yên li perçên e. Lê mixabin dagirkerên me kurdên bakurê Kurdistanê hemî xesandine loma nikarin deng ji xwe derxin.

Di vê rewşa xeter de, hêjî hin partî û rêxistinên kurdan li ser navê wan, bêdeng in. Ma gelo dê ji vê xerabtir dê hê çi hebe. Ew partiyên bi armanca Kurdistaneke serbixwe derketine, lê îro li hember êrîşkariya dagirkeran ya li ser brayê wan, bê deng in.

Heger em weke kurd dilxwazê kurdistaneke azad û serbixwene, divê em wê çerxa bi destê  dagirkeran ya ji bona Barzaniyan ji holê rakin, bişkînin. Divê em bi hemî hêz û qawata xwe ji wan re ango ji Barzaniyan re bibin piştgir.

Heger em vê nekin, em ê nikaribin tu kurdistaneke azad û serbixwe ragihînin û bibînin. Dagirkerên me roj bi roj dikevin erda pîroz û azad. Hevalbendên wan jî her wan didafîne ku zûtirîn demê bi hevre Barzaniyan ji holê rakin.

Divê her kurd vê baş bizanibin; di roja îro de, tunekirina Barzaniyan wendakirina her çar perçên kurdistanê ye. Lê wê dijmin tu caran neghêjin vê armanca xwe. Ji ber ku heta zarokekî Barzaniyan hebe, ew ê li hember dagirkeran û welatfiroşan li berxwe bide.

Barzanî têra xwe hene ji ber ku li ser xeta neteweyî ne. Kesên neteweyî bin jî wê rojekê bighêjin mafê xwe ê rewa.devlet

Ji ber vê di demeke nêzîk de wê Barzanî kurdan bikin xwedî dewleteke serbixwe. Bila qet tirs û şika kurdên ji welatê xwe hez dikin, tune be.

Aha ji ber vê ye hebûna  Barzaniyan  îro girîng e. Li gor vê girîngiyê jî divê kurd tevbigerin û pirsa ”Çima Barzanî” bibersivînin. Ji ber ku azadî û serxwebûn di wê destûr û bernameya wan de ye…

Vî nûçeyê tevayî: 962 kes dît.
Rojanekirina Dawî:16:21:48
Ji vî neweşînê ra tu şirove nehatîye nivîsandin! Tu dixwazî şiroveya ewil binivîsî?
Nerina Azad
x